အလင်းသည် မှောင်မိုက်နှင့် အဘယ်သို့ဆက်ဆံ နိုင်သနည်း။
ကမ္ဘာ ၁း ၁ -၅။ ၂ ကော ၆း ၁၄ - ၁၈။
ကမ္ဘာပေါ်မှာ အလင်းမရှိရင် အသက်မရှင်နိုင်ပါ။ ရှောလမုန်မင်းကြီးက “အကယ်စင်စစ် အလင်းသည်ချို၏၊ နေရောင်ခြည်ကို မြင်၍ ပျော်ပါးစရာရှိ၏။” လို့ ဆိုတယ်။ ( ဒေ ၁၁း ၇) ဧဝံဂေလိ အလင်းရောင်ဆိုရင် ပိုပြီးတော့ အဖိုးထိုက်မှာပါ။ အဲဒီတရားအလင်းသာလျှင် စိတ်ဝိညာဉ် လိုအပ်သမျှကို ဖြည့်စွမ်းပေးပြီး၊ ထာဝရနဲ့ဆိုင်တဲ့ အရာတွေကို ဖွင့်ပြပေးနိုင်တယ်။ သန့်ရှင်းသော ဝိညာဉ်တော်အားဖြင့် ကျွန်တော်တို့ကို ဝိညာဉ်အလင်း ပေးတဲ့အခါ သားတော်မြတ် ယေရှုခရစ်၌ ဘုရားသခင်ရဲ့ဘုန်းတော်ကို တွေ့မြင်လာရတယ်။ မြော်လင့်ချက်မဲ့၊ ကယ်သူမဲ့ကာ ပျောက်လွင့်နေပြီး၊ အပြစ်ကြောင့် ပျက်စီးယိုယွင်းတယ်လို့၊ ကိုယ်ကိုကိုယ်လည်း မြင်တတ်လာတယ်။ အဲဒီအခါ ဘုရားသခင် ဘိသိက် ပေးထားတဲ့သူ၊ “ကျေးဇူးတော်နှင့်၎င်း၊ သစ္စာတော်နှင့်၎င်း၊ ပြည့်စုံသောသူ” (ယော ၁း ၁၄) မြော်ကြည့်စရာ အသက်အဖြစ် ယဇ်ပူဇော်ပေးခဲ့သူ (ယော ၃း ၁၄ - ၁၆) ကယ်တင်ရှင်ကို တွေ့မြင်လာရတယ်။ ဒီလောကရဲ့ အလင်းဖြစ်တဲ့ ကယ်တင်ရှင် သခင်ယေရှုထံ ဧဝံဂေလိ အလင်းအားဖြင့် ဆွဲယူတော်မူတဲ့ ဘုရားသခင်ရဲ့ ကျေးဇူးတော်ကို ချီးမွမ်းကြစေသော။
အလင်းနဲ့အတူ ကွဲပြားမှု ပါလာလေ့ရှိတယ်။ အလင်းဟာ အမှောင်နဲ့ ဆက်ဆံလို့ မရ။ ဖန်ဆင်းရှင် ဘုရားက အစအဦးကတည်းက ခွဲခြားထားပြီဖြစ်လို့ မရောလိုက်နဲ့။ အလင်းရဲ့သားဟာ မှောင်မိုက်သားနဲ့ မိတ်မဖွဲ့ရ၊ သူတိုို့အကျင့်၊ ခံယူချက်၊ မှားယွင်းမှုတွေကို လိုက်မကျင့်ရ။ နေ့ရဲ့သားဆိုတာ သမ္မာသတိရှိတယ်။ ရိုးသားစွာ အစဉ်အမြဲ စောင့်နေမယ်။ သခင်ဘုရားရဲ့ အမှုတော်ကို အားယူပြီး၊ သစ္စာရှိစွာ လုပ်ဆောင်ရမယ်။ အများ လက်မခံနိုင်ရင် နေပါစေ။ ကျွန်တော်တို့ကတော့ မှောင်မိုက်အကျင့်နဲ့ ဆက်ဆံမှာ မဟုတ်ပါ။
သခင်ယေရှုရဲ့ စစ်မှန်တဲ့ အသင်းတော်ဖြစ်ရင်- မှားယွင်းတဲ့ အယူတွေ၊ ခံယူချက်တွေ၊ အဲဒီအမှားတွေကို ဟောပြောသွန်သင်သူ (သို့) အလျှော့အတင်းပြုလုပ်နေတဲ့ ခရစ်ယာန်တွေ၊ အသင်းတော်တွေနဲ့ လွတ်လွတ်ကင်းကင်း သီးခြားနေလေ့ရှိတယ်။ ကြားနားခြင်း၊ သွန်သင်ခြင်း၊ မိဿဟာယဖွဲ့ခြင်း၊ အလုပ်လုပ်ခြင်းနဲ့ စီရင်ဆုံးဖြတ်ရာမှာ၊ သမ္မာတရားနဲ့ မိစ္ဆာအယူ၊ အလင်းနဲ့ အမှောင်ကို စေ့စေ့ပိုင်းခြားလေ့လာရမယ်။ ကမ္ဘာတည်စကတည်းက ဘုရားသခင် စည်းကမ်းထားတယ် မဟုတ်လား။ ကပ်ကာလအဆုံးဖြစ်တဲ့ ယခုအချိန်မှာ သခင်ဘုရားရဲ့ အစေခံတွေ လေးလေးစားစား လိုက်နာသင့်တယ် မဟုတ်လား။
ဆင်ခြင်ရန်။ ။ သစ္စာရှိတဲ့ စစ်မှန်တဲ့ ယုံကြည်သူများဟာ “ဂိုဏ်းပေါင်းစုံလှုပ်ရှားမှု” Ecumenical Movement မှောင်မိုက်ကို ဘယ်တော့မှ နှစ်သက်လက်ခံဟန်ပြမှာ မဟုတ်ပါ။
No comments:
Post a Comment